Stories uit Kanaän 65: Salomo word tot koning gesalf

In 1 Konings 1 word vertel van Salomo se kroning.  In  1 Kronieke 28 verwys Dawid na 'n tyd wat God vir hom gesê het dat Salomo na hom koning gaan word.

Transcript

Stories uit Kanaän 65:  Salomo word tot koning gesalf     (1 Konings 1,  1 Kronieke 28)

(Ramshoring blaas)

Tobias:        Haai, Tannie Carin, hallo!  Hoekom hoor ek ‘n ramshoring wat blaas?

Tannie:          Hallo, Tobias en maats!  Julle ons begin ons storie van vandag met ‘n ramshoring, want ons gaan vertel van ‘n nuwe koning wat gekroon is.

Tobias:        O, lekker!  Dit klink na ‘n fees en mooi musiek!

Tannie:          Jy is reg!  Maar ons storie begin met koning Dawid wat nou so oud was, dat hy net nie meer warm wou word nie. Hy het heeltyd koud gekry.

Tobias:        Hulle moes baie komberse oor sy bed gegooi het.  Of wat van‘n warmwatersak?

Tannie:          Tobias, hulle het nog komberse probeer, maar dit het niks gehelp nie. Die koning het nog steeds gelê en bewe.  Hulle het seker ook nie warmwatersakke soos ons gehad nie, maar hulle maak toe ‘n ander plan.  Hulle soek toe ‘n baie mooi meisie, om sommer ‘n lewendige warmwatersak vir hom te wees.  Hulle soek en soek toe en kry vir Abisag.  Sy moes die koning versorg en sy moes langs hom lê tot hy warm geword het.

Tobias:        (lag) ‘n Lewendige warmwatersak!  (lag)   Maar ek dog ons gaan van ‘n nuwe koning hoor?

Tannie:          Ons gaan!   Julle, in daai tyd wat Dawid nou al so oud was, het sy seun Adonia gedink:  “Ek gaan een van die dae koning word.”  Toe kry hy vir hom ‘n strydwa en soldate wat op perde ry.  Hy het ook vyftig manne gekry wat voor hom kon uithardloop in die straat.

Tobias:        Tannie, dit klink dan nou soos Absalom se storie?

Tannie:          Jy is reg.  Adonia was Absalom se broer.   Dawid het nooit met Adonia geraas toe hy as ‘n kind stout was nie.  Nou het hy ‘n lelike, hoogmoedige mens geword, al was hy baie mooi van buite.

Tobias:        Ag, dis nou jammer!    Nou wat doen die Adonia toe?

Tannie:          Julle, Adonia het party van die priesters en die hoof van die soldate omgepraat om aan sy kant te wees.  Toe eendag, nooi hy klomp mense na ‘n offerfees:  die priesters, party van Dawid se lyfwagte, en al sy broers, behalwe Salomo.  Hy het klomp skape, beeste en kalwers gevat en baie lekker kos laat maak.  Toe dit gebeur, het die profeet Natan na Salomo se ma, Batseba, toe gegaan:  “Batseba, het jy gehoor Adonia het koning geword en Dawid weet niks daarvan af nie.”  Batseba het sekerlik geskrik, want in daai dae het ‘n nuwe koning maklik sommer sy eie broers en ooms doodgemaak dat hulle hom nie kan pla nie.  Natan sê toe:  “Vat nou my raad:  gaan na Dawid toe en vra hom of hy  onthou dat hy beloof het Salomo kan koning word.   Vertel hom  wat Adonia nou doen.  Ek sal ook kom en verder met die koning daaroor praat.”  Batseba gaan toe na Dawid se kamer toe waar Abisag besig was om hom te versorg.  Sy vertel hom toe alles van Adonia.  Sy het ook gevra of hy nog onthou van sy belofte aan haar.  Net toe kom Natan ook daaraan en Batseba gaan uit die kamer uit.  Natan het gevra: “Koning, die Adonia het homself nou sommer koning laat maak.  Hy het my nie eers genooi nie.  Maar, laat ek hoor:  het u gesê hy moet koning word?  Of wat gaan nou aan?”   Dawid lê toe nog steeds in sy bed en roep vir Batseba terug:  “Batseba, ek het mos voor God belowe dat jou seun Salomo gaan koning word na my.  Daai tyd wat ek die tempel wou bou, het God vir my gesê dat my seun Salomo die tempel sal bou.”  Batseba was baie dankbaar!

Tobias:        Wat gebeur toe, Tannie?

Tannie:          Tobias, Dawid sê toe vir Natan  wat hy nou moet doen:  “Natan,  jy, die soldate wat my oppas, priester Sadok en Benaja moet vir Salomo op my muil laat ry.  Vat olie en jy en Sadok moet hom salf tot koning.  Blaas dan op die ramshoring en roep:”Lank lewe koning Salomo!”  Loop dan agter hom aan en laat hom op my troon sit.”  Hulle doen dit toe.  Toe hulle stap na die troonkamer het hulle op fluite geblaas en gejuig en geroep dat die aarde dreun.

Tobias:        ‘n Groot lawaai?  Het Adonia die ramshoring en gejuig gehoor?

Tannie:          Ja!   Hy en sy gaste was net klaar geëet toe hulle die lawaai hoor.   Joab vra toe:  “Wat gaan aan?”  Iemand kom hardloop toe daar aan en vertel:  “Salomo is tot koning gekroon is. Hy sit op sy pa se troon!  Die mense het al vir koning Dawid gaan geluk wens.  Die koning het ook daar op sy bed gekniel en gebid en God geprys oor die kroning.”  Die mense by Adonia het so groot geskrik dat hulle almal weggehardloop het.  Adonia het spierwit geword van bangwees.  Hy het na die tabernakel gehardloop en aan die horings van die altaar  vasgegryp.  Dit is gewoonlik gedoen as jy bang is iemand maak jou dood. 

Tobias:        Nee!  Het Salomo hom doodgemaak?

Tannie:          Nee, Tobias, hy het vir Adonia laat kom en gesê hy moet huis toe gaan.  As hy vir Salomo moeilikheid gee, sal hy hom moet doodmaak, maar as hy hom gedra, sal hy niks oorkom nie.

Tobias:        Fantasties!  So, die dag het goed geëindig.  Salomo sit op die troon; Adonia sit veilig op sy stoep en koning Dawid kan nog bid en kry lekker warm.   (lag)  Ek is bly!

Tannie:          Tobias, ons storietyd vir vandag is nou klaar.  Ons sien uit na volgende keer.  Intussen kan ons ook soos Dawid vir God loof en dankie sê vir sy liefde vir ons.  Ons groet dan.  Totsiens, almal!

                                                                                    ***