Stories uit Kanaän 71: Die koningin van Skeba kom kuier

Die koningin van Skeba was een van die leiers van daardie tyd wat Salomo kom toets het om te sien of hy regtig so slim en wys is soos wat van hom vertel word.  Ons lees dit in 1 Konings 10 en 2 Kronieke 9.

Transcript

Stories uit Kanaän 71:  Die koningin van Skeba kom kuier      (1 Konings 10 en 2 Kronieke 9)

Tobias:        Hallo, tannie Carin!  Raai-raai?

Tannie:          Hallo, maats en hallo, Tobias.  Speel ons raai-raai vandag?

Tobias:        Ja, Tannie.  Raai-raai:  as hy gaan, dan staan hy.  As hy staan, dan gaan hy.

Tannie:          As hy gaan, dan staan hy.  As hy staan, dan gaan hy.  Mm.. Nee, ek weet nie.

Tobias:        Tannie, dis ‘n kwikstertjie!  Daai voëltjie.

Tannie:          ‘n Kwikstertjie!  Dis waar!  As hy op die grond staan, dan gaan sy stertjie so op en af, op en af.  En as hy vlieg, dan staan sy stertjie stil!  Dis ‘n mooi een!

Tobias:        Tannie, was daar raaisels in die Bybel se tyd?

Tannie:          Verseker was daar, Tobias.  Mm.. ek weet!  Kom ek vertel julle van die koningin van Skeba.

Tobias:        Koningin?  Lekker! 

Tannie:          Ons het mos vertel van koning Salomo wat so baie wysheid by God gekry het.  Al die lande het geweet van hierdie slim koning van Israel.  Die koningin van Skeba het ook van hom gehoor.  Ons is nie lekker seker of sy uit  Afrika gekom het, of uit Arabië nie.  Maar dit maak nie so baie saak nie.  Wat saak maak, is dat sy die hoof was van haar land.  En sy was ryk.  En sy moes ook slim gewees het.

Tobias:        Hoekom sê Tannie sy was slim en ryk?

Tannie:          Julle, hierdie koningin het spesiaal vir Salomo kom kuier om vir hom raaisels te vra.  Sy wou sien of hy regtig so slim en wys is soos die mense haar vertel het.  Sy het slim vrae uitgedink en vir hom allerhande raaisels gevra:  “Hoe werk dit?  Hoe weet ons dat?  Waar kry mens dit?  Wat beteken dat?”  Sy het gevra en gevra en gevra.

Tobias:        En het Salomo die antwoorde geweet?

Tannie:          Ja, Tobias!  Alles wat sy gevra het, het hy geantwoord.   Alles!  Nie een van haar baie moeilike vrae was vir hom te moeilik om te antwoord nie!  

Tobias:        Regtig!  Dis wonderlik!   Maar Tannie sê sy was ook ryk?

Tannie:          Julle, sy het nie alleen van Skeba af gekom nie.  Sy het baie mense en baie 

kamele saamgebring.  En op die kamele was geskenke vir Salomo.

Tobias:        O, lekker!  Watse geskenke het sy gebring?

Tannie:          Sy het kruie gebring.  Jy weet, kruie wat mens in kos gooi?   Israel het nog nooit vantevore so baie kruie op een slag gesien nie.   Dalk het dit heerlik geruik rondom daai kamele wat dit gedra het.   En, sy het ook edelstene gebring:  pragtige blink en gekleurde klippies wat so hard is dat dit nie kan breek nie.  Mense gebruik edelstene in juwele.  Of dalk in ‘n koning se kroon.   

Tobias:        Mensig!  Sy moes ryk gewees het!

Tannie:          Maar dit was nie al nie.  Sy het ook goud gebring:  die Bybel praat van vier ton goud.   As mens dink die kamele moes dit oor ‘n ver ent gedra het, dan dink ons omtrent dertig of meer kamele was nodig om die klomp goud te dra!

Tobias:        Aarde, Tannie?   Het Salomo vir haar sy paleis en die mooie tempel gewys?

Tannie:          Dit klink so, ja, Tobias.  Ons dink sy het ook saam met Salomo in die paleis geëet, want sy het gesê:  “Koning Salomo, alles hier by jou slaan my asem weg!   Hierdie kos wat jy vir ons laat voorsit; wel, ek het nog nooit so iets gesien nie.”  Sy het haar verstom aan die manier waarop die tafelbediendes en die skinkers die kos en die wyn ingedra en bedien het.  Haar mond het oopgehang vir die mooi klere wat al die tafelbediendes aangehad het.

Tobias:        Ai, Tannie, ek wens ek kon Salomo hoor en sien!

Tannie:          Ja, ek ook!   Tobias, en die dag toe Salomo met sy optog na die tempel gaan, het haar mond weer oopgehang.  Die hele optog was so mooi.  En die tempel!     Sy het toe gesê:  “Mense het net die helfte vir my vertel.  Alles is so mooi hier.  Hulle het vertel u is so wys en ek het dit nie geglo nie, maar nou het ek self gesien u is baie meer wys as wat daai mense kom vertel het.  Mensig!  U amptenare het so ‘n groot voorreg om elke dag u wysheid te kan hoor!  Ek wil die Here loof!  Toe Hy u koning laat word het, het Hy gewys hoe lief Hy vir u en vir Israel het. Nee kyk, dis alles wonderlik verby!”

Tobias:        Ai, waar was ons!  Maar Tannie, het Salomo vir haar ook ‘n geskenk gegee?

Tannie:          Ja, hy het!  Sy het iets gesien en gevra:  “O, dis mooi!  Kan ek hiervan kry?”  En dan het Salomo haar gegee wat sy gevra het.   Alles wat sy gevra het, het Salomo vir haar gegee.  Toe sy die dag terugry met haar klomp kamele, toe vat sy meer geskenke terug as wat sy vir Salomo gebring het.

Tobias:        Tannie, alles in die storie klink vir my so mooi, maar ek hou die meeste daarvan dat die koningin nie vir  Salomo kon vasvra met een van haar raaisels nie.  (lag)  Ek hou baie daarvan!

Tannie:          Tobias, en die wonderlikste is dat baie van Salomo se wysheid wat hy by God gekry het,  opgeskryf is in byvoorbeeld Spreuke in die Bybel.  Ons kan dit self lees.  Ja, en ek sou darem baie graag die tafelbediendes en skinkers se klere wou sien.  Maar,  Tobias, maats, lyk my ons storie-tyd is nou al weer om.  

Tobias:        Ai, storie-tyd vlieg altyd!  Maar toemaar, ek en my maatjie gaan ons besig hou tot volgende storie-tyd met Salomo se wysheid in die Bybel.  Ons gaan ook vir mekaar raaisels vra. (lag)  Maats, lekker speel!  Totsiens, totsiens!

                                                                                           ***