Stories uit Kanaän 78: Vyf konings van Israel

Vyf konings van Israel word in 1 Konings 15 en 16 beskryf, maar ons lees nie van hulle in 2 Kronieke nie.  Hulle almal het afgode aanbid.

Transcript

Stories uit Kanaän 78:  Vyf konings van Israel      (1 Konings 15 en 16)

Tobias:        Hallo, tannie Carin en maats!  Tannie, gaan ons vandag nog ‘n storie hoor oor ‘n koning in die Bybel se tyd?

Tannie:          Hallo, julle almal!   Tobias, hoe lyk dit met ‘n storie oor  vyf konings?

Tobias:        Sjoe!  Dis baie!   (lag)  Ons hoef seker nie hulle name te onthou nie?

Tannie:          Nee, Tobias, ons hoef nie!   Maar kom ons begin!  Julle onthou mos dat die volk nou in twee gedeel was.  Al die konings uit Juda was die afstammelinge van Dawid, maar die konings van Israel was nie net uit een familie nie.

Tobias:        Hoekom nie, Tannie?

Tannie:          Tobias, hulle het so onder mekaar gestry en baklei.  En meeste van hulle het glad nie vir God gedien nie.  Hy het mooi gevra hulle moet Hom liefhê, maar as hulle aangehou het om afgode te dien, het God hulle gestraf deur die koningskap van hulle familie af weg te vat.

Tobias:        Ai, tog, stoute konings!  Maar vertel  bietjie van die vyf konings?

Tannie:          Julle, na Jerobeam, die eerste koning van Israel, was sy seun Nadab koning vir twee jaar lank.  Hy het net soos sy pa kalwerbeelde aanbid.  Na die twee jaar was daar ‘n man Baesa uit die stam van Issaskar.  Hy het saamgewerk met ander mense.  Ons noem dit ‘n sameswering: hulle het saamgesweer dat hulle iets aan hom gaan doen.  Eendag was Nadab en sy leër besig om teen die Filistyne oorlog te maak en in daai tyd maak Baesa hom toe dood.

Tobias:        Haai, nee!   Word Baesa toe koning?

Tannie:          Ja, hy word toe koning en maak Nadab en Jerobeam se hele familie dood.  ‘n Ou profeet het dit al in Jerobeam se tyd voorspel.  

Tobias:        O aarde, toe is daar sommer ‘n nuwe koningsfamilie!  Het Baesa die Here gedien?

Tannie:          Julle, hy was vier en twintig jaar lank koning,   So hy het baie jare gehad om terug te draai na God toe.  Maar nee,  hy het ook afgode gedien.  Toe kom daar ‘n ander profeet, Jehu en sê:  “Baesa, die Here sê dat Hy jou uit die stof opgetel het.  Jy was niks en toe word jy koning van Israel,  Hoekom het jy die volk laat afgode dien?  Die Here gaan die koningskap van jou huis ook wegvat.”   Hy was blykbaar ‘n baie dapper koning, maar dit help niks as jy nie die Here dien nie.  Hy is toe oorlede en sy seun Ela het koning geword.

Tobias:        ‘n Nuwe koning!  Het hy die Here gedien?

Tannie:          Nee, Tobias, in sy twee jaar as koning het hy ook afgode aanbid!  Ela het soldate gehad wat met strydwaens geveg het.  Hy het twee manne gehad wat hulle hoof was.  Een van hulle, Simri, het toe saamgesweer teen Ela.   Eendag het Ela by die opsigter van sy paleis gaan kuier.  Hulle het seker gesels en was vrolik en het klomp wyn gedrink.  Toe Ela nou goed dronk was van al die wyn, kom Simri in en maak hom dood.   Toe doen Simri dieselfde as koning Baesa:  hy maak almal in Ela en Baesa se familie en sy raadgewers dood.   Dit was nes die profeet Jehu voorspel het.  

Tobias:        Al weer ‘n nuwe koningsfamilie?  Word Simri toe koning?

Tannie:          Ja, Simri word toe koning.  Raai net vir hoe lank?  

Tobias:        Nee, ek weet nie.

Tannie:          Hy was koning vir sewe dae!

Tobias:        Net sewe dae?  Wat het met hom gebeur?

Tannie:          Tobias,  die volk was besig om teen die Filistyne te veg.  Toe hoor hulle hul koning Ela is dood en Simri is nou koning.  Israel was die lus vir die Simri nie.  Hy het ook afgode aanbid!   Hulle maak toe dadelik die hoof van die leër, Omri, hulle koning.  Hulle los die Filistyne toe net daar en trek op na die stad waar Simri nou was.  Toe hy dit sien word hy bang.  Hy gaan kruip toe iewers in die  paleis weg en steek dit bo-op homself aan die brand, sodat hy gesterf het.

Tobias:        Mensig, Tannie!  Was Omri nou koning?

Tannie:          Julle, die volk was nou  verdeeld:  party het gesê:  “Omri moet ons koning wees.”  Ander het weer gesê:  “Tibni moet ons koning wees.”    Die stryd het vier jaar lank aangehou, maar toe Tibni sterf,  het Omri koning geword.

Tobias:        Weer ‘n nuwe koningshuis!  Wat het Omri gedoen?

Tannie:          Omri het vir hom die Samariaberg gekoop.  Daarop het hy ‘n groot stad gebou.  Samaria was later die hoofstad van Israel se gedeelte van die land. 

Tobias:        En het Omri die Here gedien?

Tannie:          Nee, Tobias, die Bybel sê hy was nog slegter as al Israel se vorige konings.  Hy het afgode en goue kalwers aanbid.   Hy was blykbaar ‘n dapper koning, maar na twaalf jaar as koning het dapperheid om niks gehelp nie.  Hy het steeds nie die Here gedien nie.  Hy is toe oorlede en sy seun Agab het koning geword.

Tobias:        Tannie, klink my daai aardse konings het gesukkel om reg te kies!  Ek wil maar liewer net een koning hê:  Jesus.  

Tannie:          Ja, Tobias!  In die Nuwe Testament word Jesus genoem:  die Koning van die konings!  Hy is ons koning.  Maats, kom ons doen wat Hy vra.

Tobias:        En dis ‘n Koning wat lief is vir sy mense!   Maats, is dit nou nie wondelik, fantasties nie!  As ons nou groet, kan julle sommer vir julleself ‘n liedjie maak en sing:  “Jesus is ons koning, Jesus is ons koning.”  Tannie, ons moet ‘n mooi liedjie daaroor skryf.

Tannie:          Ons moet ja, Tobias!  Maar nou gaan ons eers groet.  Maats, mooi bly en wees lief vir die een Koning van die konings!  Totsiens, almal!

                                                                                    ***