Stories uit Kanaän 85: Koning Ahasia van Israel

In 1 Konings 22 en 2 Konings 1 lees ons van koning Ahasia, die koning wat uit sy bokamer geval het.

Transcript

Stories uit Kanaän 85:   Koning Ahasia van Israel   (1 Konings 22 en 2 Konings 1)

(geluid van vuurtjie wat brand)

Tobias:        Hallo, maats!   Ek en tannie Carin sit nou so lekker  by ‘n vuurtjie.  Die vlammetjies is vir my so mooi!

Tannie:          Hallo, julle!  Ja, dis so lekker rustig!  

Tobias:        Tannie, ons  hoor mos baie van vuur in die Bybel?

Tannie:          Ja, daar is baie stories oor vuur.  Miskien kan ons sommer vandag een van hulle vertel.   Julle onthou mos dat die konings van Israel en Juda baie gesukkel het om die Here te dien.  In vandag se storie het die Here vuur gebruik om die koning te help om te besef wie God is.

Tobias:        Haai!  Regtig?  Laat ons hoor?

Tannie:          Tobias, maats,  Agab en Isebel het drie kinders gehad.  Na Agab se dood het hulle oudste, Ahasia koning geword.   Hy  was net twee jaar lank koning oor Israel.  Maar in die tyd het hy nes sy pa en ma afgode gedien.

Die arme koning het eendag ‘n sleg ding oorgekom.  Ons weet nie wat het gebeur nie, maar hy het deur die traliewerk van sy bokamer geval en baie seergekry.  Hy het in die bed gelê en kon nie opstaan nie.  Dit was aaklig!

Tobias:        Was daar nie dokters wat hom kon help nie, Tannie?

Tannie:          Tobias, daai tyd se dokters kon nog nie opereer en bene spalk soos nou nie.  So, die arme man was maar daar in die bed.  Toe kry hy ‘n plan:  hy gaan bietjie hoor of die afgod Baäl-Sebub vir hom kan sê of hy weer hier gaan opstaan.

Tobias:        Het hy nie die Here gevra nie? 

Tannie:          Klink of hy nie eers daaraan gedink het nie.  Nee, hy het boodskappers gestuur om vir die afgod te gaan vra of hy gesond gaan word.   Die Engel van die Here praat toe met sy profeet Elia:  “Loop gou en kry Ahasia se boodskappers langs pad.   Jy moet vir hulle vra:  Is daar dan nie ‘n God in Israel nie?  Hoekom loop julle na Baäl-Sebub vir raad?  Sê vir die koning die Here God sê hy sal nie opstaan uit daai bed nie.  Hy sal doodgaan.”  Die boodskappers draai toe viervoet om en gaan terug na die koning.  

Tobias:        O, hoe het die koning die boodskap gevat, Tannie?

Tannie:          Die koning het besef hulle was darem te kort weg.  Hulle kon nie tot by Ekron geloop het nie.  Hy vra toe: “Hoekom het julle so gou omgedraai?”  Hulle het geantwoord:  “Ons het ‘n man langs pad gekry.  Hy het vir ons gesê dat ons vir u o koning moet vra hoekom vra u raad by Baäl-Sebub as daar dan ‘n God in Israel is.”  “En koning, hy het gesê u gaan sterf.”  Die koning wou dadelik weet hoe lyk die man.  Hulle vertel hom dat hy velklere aangehad het.  Toe weet koning Ahasia dis die profeet Elia.  Hy stuur toe ‘n belangrike soldaat, ‘n offisier, en nog vyftig soldate om vir Elia te gaan soek.  Hulle kry hom toe waar hy op die top van ‘n berg sit.  Die offisier sê toe:  “Man van God, die koning beveel jou om af te kom na hom toe.”  Elia het bly sit en gesê: “So seker as wat ek ‘n man van God is, sal hier nou vuur kom wat julle gaan brand.”

Tobias:        Wat?  Gebeur dit toe?

Tannie:          Ja, daar kom toe vuur van die hemel af op die soldate!  Maar die koning het hom nie tot die Here bekeer toe hy dit hoor nie.  Hy stuur toe nog ‘n offisier en vyftig soldate.  Toe hulle bo-op die berg kom by Elia, sê die offisier: “Man van God, die koning sê jy moet vinnig na hom toe kom.”  En julle, daar gebeur presies dieselfde ding as die vorige keer.  Elia het gepraat van die vuur en toe kom dit af op die soldate!  Tobias, maar Ahasia het nog steeds nie na die Here gedraai nie.  Hy stuur sowaar ‘n derde offisier en vyftig soldate na Elia toe.  

Tobias:        Fooi tog!  Hulle was seker bang daar kom weer vuur?

Tannie:          Ja!  Toe die offisier bo kom, val hy op sy knieë voor Elia en vra:  “Man van God, ag spaar tog ons lewens.  Moenie dat vuur ook op ons afkom nie, asseblief!”  Die Engel van Here sê toe vir Elia hy hoef nie bang te wees vir die offisier nie.  Hy moet saam met hom afgaan na koning Ahasia toe.

Tobias:        Gaan Elia toe, Tannie?

Tannie:          Ja, Tobias, hy stap toe saam af en gaan tot by koning Ahasia in sy kamer.  Toe Elia by koning Ahasia kom, gee hy vir hom presies dieselfde boodskap as wat hy vir sy eerste boodskappers gegee het:  “Koning Ahasia, omdat jy raad gaan vra het by ‘n afgod, so asof daar nie ‘n ware God in Israel is nie, gaan jy sterf.  Jy sal nie gesond word na hierdie lelike val van jou  nie.”  En julle, toe het Ahasia gesterf, net soos die Here deur Elia gesê het.

Tobias:        Hy moes maar eerder na die Here geluister het!  Ai, dis jammer.  Tannie, wie word toe die koning?  Een van sy kinders?

Tannie:          Julle, koning Ahasia het geen kinders gehad nie.  So, toe hy nou dood is, het sy jonger broer, Joram koning oor Israel geword.

Tobias:        Tannie, lyk my die Here gebruik enige ding om vir mense te vra om terug te kom na Hom toe.  In vandag se storie was dit glad vuur!  Ek is bly ons vuurtjie is net klein en maak ons lekker warm.  Maar ons vuurtjie sal my laat onthou van hierdie storie.  Maats, lyk my ons storie-tyd is nou sowaar om.   Ek gaan nog hier lekker bietjie by die vuur sit en dink aan ons wonder God wat wil hê almal moet na Hom toe kom.  Ons groet dan.  Ons gesels gou weer.  Totsiens!

                                                                                          ***