Stories uit Kanaän 86: Elia gaan hemel toe in 'n warrelwind

Elia is een van die Bybelfigure wat lewend hemel toe is - in 'n wa en perde van vuur in 'n warrelwind.  Ons lees dit in 2 Konings 2.

Transcript

Stories uit Kanaän 86:  Elia gaan hemel toe in ‘n warrelwind  (2 Konings 2)

Tobias:        Kippetie,  kippetie, kippetie, kippetie, kippetie, kippetie.

Tannie:          Hallo, Tobias, wat maak jy?

Tobias:        Hallo, julle!  Ek speel ek ry op ‘n perd!  Kippetie, kippetie, kippetie, kippetie!  Tannie, waarmee het die profete Elia en Elisa gery?  Met perde of wat?

Tannie:          Tobias, hulle het eintlik maar meestal gestap.  Maar die konings van daai tyd sou met perde en perdekarre gery het.

Tobias:        O!  Ek wonder of Elia ooit gevoel het hoe voel dit om in ‘n perdekar te ry?

Tannie:          Ek weet regtig nie of hy ooit in sy lewe op ‘n perdekar was nie, maar kom ek vertel julle waarin hy gery het die dag wat hy hemel toe is.

Tobias:        Tannie Carin bedoel toe hy dood is?

Tannie:          Nee!  Elia is nie dood soos ander mense nie.  Kom luister wat het gebeur.

Tobias:        Haai, nou is ek baie nuuskierig!  Vertel, asseblief!

Tannie:          Tobias, maats, Elia en Elisa het oral saamgegaan.  Op ‘n dag sê Elia vir Elisa:  “Elisa, bly hier in Gilgal, want ek moet na Bet-el toe gaan. Die Here het so gesê.”  Elisa het geantwoord:  “Nee, nee, ek gaan saam.  Net so seker as wat die Here leef en as wat u leef!”   En daar stap die twee na Bet-el toe.   Toe hulle daar aankom, kom ‘n paar profete na Elisa toe.  Hulle roep hom eenkant en fluister in sy oor:  “Het jy geweet God gaan vandag jou leermeester van jou af wegvat?”  Elisa, wou nie luister nie:  “Sjuut!  Ja, ek weet, maar moenie daaroor praat nie.”   

Tobias:        O, aarde!  En toe, Tannie?

Tannie:          Elia praat toe weer met Elisa: “Luister, jy kan maar hier bly, maar die Here stuur my na Jerigo toe.”  Elisa se antwoord was:  “Huh-uh!  So seker as wat die Here leef en as wat u leef, ek sal u nie alleen laat gaan nie.”  En daar loop die twee na Jerigo toe.  Tobias, en jy sal nie kan raai nie, maar wat sê die profete in Jerigo vir Elisa? “Elisa, het jy geweet dat die Here vandag vir Elia van jou af gaan wegvat?”  Elisa het vir hulle ook gesê hy weet, maar hulle moenie daarvan praat nie.   Julle, hulle was net rustig daar, toe sê Elia;  “Elisa, bly hier, want die Here stuur my na die Jordaanrivier toe.”  Tobias, kan jy raai wat het Elisa geantwoord?

Tobias:        Tannie?  Seker:  Sowaar as wat die Here leef en as wat Elia leef, Elisa sal nie vir Elia die hele ent pad alleen laat loop nie.

Tannie:          Dis presies reg.  Julle, vyftig van die profete van Jerigo het ‘n ent agter hulle aangeloop.  Hulle het besef hier gaan iets gebeur.   Elia en Elisa het by die Jordaanrivier gekom.  Dit was vol water.  Daar was ook nie ‘n brug daar naby nie.  Toe haal Elia sy mantel af.  Hy rol dit op in ‘n lang rol.  Hy vat dit en slaan op die water.  En, en daar verdeel die water in twee, sodat hulle op droë grond deur die rivier kon loop!

Tobias:        Haai, Tannie!  Amper soos in Moses se tyd!

Tannie:          Ja, amper nes in Moses se tyd!  Toe hulle twee nou deur die rivier is, vra Elia vir Elisa:  “Wat wil jy hê moet ek vir jou doen voor ek van jou af weggaan?”  Elisa het geantwoord:  “Daar moet asseblief twee keer soveel van u gees op my wees as wat op u is.”  Elia, het geantwoord:  “Mmm, jy vra iets moeiliks!  Net as jy sien hoe ek van jou af weggevat word, sal dit kan gebeur.”  Hulle twee loop toe lekker langs mekaar en gesels.  Die volgende oomblik, gebeur ‘n wonderlike ding.  Iets wat Elisa nooit in sy lewe sou vergeet nie.  Ewe skielik was daar ‘n perdewa met perde tussen hulle twee.  Maar, julle die wa en die perde was asof hulle van vuur gemaak was!  Toe Elisa weer kyk, toe is Elia op daai wa.  Elisa hoor toe iets soos ‘n groot warrelwind wat soos ‘n storm klink.   En die warrelwind  vat vir Elia en die wa en perde van vuur op hemel toe.   Elisa het uitgeroep:  “My vader,  my vader, u was vir Israel die oorlogstrydwa met sy soldate!”  Hy het gekyk en gekyk totdat hy nie meer vir Elia kon sien nie.  Toe skeur hy sy klere in twee.  Dit was ‘n teken dat hy baie hartseer was.

Tobias:         Tannie?    ‘n Perdewa en perde van vuur!  Wat doen Elisa toe?

Tannie:          Julle, in die warrelwind het Elia se mantel afgeval.  Elisa het dit opgetel en is terug Jordaanrivier toe.  Toe hy daar kom, vat hy die mantel, slaan op die water  en roep:  “Waar is die Here God van Elia?  Waar is Hy?”  En julle, daar maak die water weer oop en gee vir Elisa ‘n droë pad om op te loop.  Die vyftig profete het dit gesien en sê vir mekaar:  “Die gees van Elia is nou op Elisa.”  Hulle loop toe nader en buig voor hom.  Een het gesê: “Ons het vyftig dapper ouens hier onder ons.  Hulle kan vir Elia gaan soek.  Dalk het die Here hom opgelig en iewers anders neergesit.”  Elisa het gesê hulle moenie gaan nie.  Maar die profete het aangehou kerm, tot hy gesê het hulle kan maar gaan.  

Tobias:        Kry hulle hom toe?

Tannie:          Nee, Tobias, hulle het vir drie dae lank oral gesoek.   Toe hulle by Elisa kom, sê hy:  “Ek het julle mos gesê julle hoef nie te gaan soek nie.”

Tobias:         Tannie, dis so ‘n mooi storie!  God vat vir Elia in ‘n wa en perde van vuur in ‘n warrelwind na die hemel toe.  Tannie, ek moet nou dadelik vir my maatjie hierdie storie gaan vertel.   Ek groet julle almal!  Totsiens!   Totsiens!

Tannie:          Maats, ek kan verstaan dat Tobias so opgewonde is oor die mooi storie.  Is ons God nie wonderlik nie?  Elke dag het Hy ‘n fantastiese plan vir daai dag en met elkeen van ons!  Maats, ek groet dan ook tot volgende keer!  Totsiens!  Mooi bly!  Totsiens!

                                                                                                ***